Aastana e Research and Understanding Quran

دنیا میں ہر وہ انسان جو کسی مذہب سے تعلق رکھتا ہے اپنی کتاب کو الہامی یعنی خالق کی دی ہوئی تصور کرتا ہے اور اسے عبادات کی کتاب سمجھتا ہے۔ اس لئے اگر یہ دعویٰ مسلمانوں نے دہرا دیا تو کونسی قیامت آگئی۔ مسلمان بھی وہی بات کر رہے ہیں جو دوسرے مذاہب والے کہہ رہے ہیں۔ دوسرے لوگ اپنی بات کہتے رہیں ہم اپنی بات کہتے رہیں گے کسی کو ہم سے اور ہمیں کسی سے کیا لینا دینا ۔

لیکن نہیں۔۔!

آج علماء اسلام ان کی کتاب کو الہامی نہیں بلکہ انسانی کہتے ہیں اور ان میں تحریفات نکالنے کے درپے ہیں۔ انہیں اصرار ہے کہ ہماری کتاب ہی سچی ہے اور باقی تمام جھوٹی ہیں اور اسی بنیاد پر باہم دست و گریباں ہیں اور ایک دوسرے کا خون خرابا کرنے پر تلے ہوئے ہیں۔ ایک انسان دوست شخص کبھی بھی مذہب کی بنیاد پر خون خرابا قبول نہیں کر سکتا۔ جس کا ردعمل اسے مجبور کرتا ہے کے وہ حقیقت جانے اور اس قتل و غارت گری کو روکے اور دوسروں پر تنقید کرنے سے پہلے اپنے گریبان میں جھانکے۔ اس لئے آج بحثیت مسلمان ہرایک کا یہ فرض ہے کہ وہ اپنی کتاب سے حقائق کو معلوم کرے اور اسی لئے ہم قرآن کو سمجھنا چاہتے ہیں۔
ہمارے اسلاف نے احادیث ، فقہ اور قصے کہانیوں کے زیر اثر جو مفاہیم دئیے ہیں ہم ان کی چھانٹ پھٹک کرنا چاہتے ہیں تاکہ حقیقت واضح ہو سکے۔ اس تحقیق میں خلوص نیت کے ساتھ ساتھ غیر جانبدارانہ رویہ اختیار کرنا ہوگا۔ حقیقتاتحقیق وہی ہوتی ہے جو خلوص نیت سے کی جائے جس میں کسی طرف جھکاؤ نہ ہو جو اپنی اچھائیوں اور برائیوں پر نظر رکھے۔ جو صحیح کے امکان کے ساتھ غلطی کا بھی امکان ذہن میں رکھے۔
دراصل اغیار کی تحقیق قرآن پر نہیں بلکہ اس کے تراجم اور مفاہیم کی بنیاد پر ہے۔ اس لئے ہمیں ان تراجم اور مفاہیم سے بالا تر ہو کر اپنی کتاب کو دیکھنا ہوگا کہ خالص عربی قوائد اور لغت کی بنیاد پر کیا ترجمہ اور مفہوم سامنے آتا ہے۔ اس لئے اس سوال کا جواب کہ ۔۔۔

قرآن ہی کیوں ؟
بہت سادہ ہے کہ۔۔۔۔

ہم مسلمان گھرانے میں پیدا ہوئے مگر ہمیں اپنے مذہب میں خود بہت سی خامیاں نظر آرہی ہیں جسکی وجہ سے آج ہم دنیا کی نظر میں انتہائی وحشی قوم قرار دئے جا چکے ہیں انکی نطر میں ہمارے کوئی اصول و پیمانے نہیں ہیں۔

ہماری تمام تر قرآنی تفاسیر ناموں کے فرق سے ایک ہی جیسے بے مقصد واقعات اور قصے کہانیوں سے بھری پڑی ہیں جو کہ یونان اور روما کے دیومالائی مذاہب میں بھی موجود ہیں جن کا چربہ آج عیسائیت اور یہودیت شکل میں موجود ہیں۔

ہماری احادیث بھی جو کے اسی قسم کے ناقابل یقین واقعات اور کہانیوں سے بھری پڑی ہیں جن کی بنیاد پر مختلف فقہائے بنائی گئی ہیں جنہوں نے امت کو کئی فرقوں میں تقسیم کیا ہوا ہے۔ انہی احادیث و فقہوں کی بنیاد پر ہر فرقہ خود کو صحیح اور دوسرے کو کافر تک قرار دینے میں جھجک محسوس نہیں کرتا۔
اس لئے مجبوراً ہمیں دیکھنا ہوگا کہ کیا ہماری کتاب بھی یہی کچھ کہہ رہی ہے؟ اگر ہمارا یہ دعویٰ ہے کہ ہماری کتاب الہامی کتاب ہے تو پھر کیا وجہ ہے کے ہم اس کتاب کو پس پشت ڈال کر دیگر کتابوں کو اٹھائے پھرتے ہیں اورجن کی وجہ سے اس کتاب میں دیئے گئے واضح احکامات کو ماننے سے بھی انکاری ہیں۔اور اگر بات کچھ اور ہے تو پھر حقیقت کیا ہے؟
اسی حقیقت کی تلاش میں شروع کیا گیا یہ سفر پوری آب و تاب سے جاری و ساری ہے۔ آج دنیا کے کونے کونے سے رجوع الی القرآن کی جو سدائیں سننے میں آ رہی ہیں ان سے یہ اندازہ بخوبی لگایا جا سکتا ہے کہ اب وہ منزل دور نہیں جب قرآن ایک بار پھر ان تمام جکڑ بندیوں سے آزاد ہو کر مسلمانوں کے ہاتھ میں ہوگا اور ہر وہ شخص جو مسلمان کہلائے گا وہ امن اور سلامتی دینے والا نظر آئے گا۔