AASTANA.COM :: About Us

سلسلہ دعوت قرآنی کا مقصد نہ تو کوئی جماعت بنانا ہے اور نہ ہی کسی فرقے کی داغ بیل ڈالنا ہے تمام انسانیت ہماری جماعت ہے ہمارا کسی مذہب والے یا مسلک سے کوئی جھگڑا نہیں جو بھی سلامتی دینے میں یقین رکھتا ہے وہ مسلم ہے اور ہمارا ساتھی ہے اور جو بھی امن چاہتا ہے وہ مومن ہے اور ہمارا بھائی ہے۔ قرآن کا ارشاد ہے۔۔۔

’’کَانَ النَّاسُ اُمَّۃً وَاحِدَۃ‘‘
’’تمام انسانیت ایک ہے، تھی اور رہے گی‘‘
’’فَبَعْثَ اللّٰہُ النَّبِیِّنَ مُبَشِّرِیْنَ وَ مُنْذِرِیْنَ‘‘
’’پس اللہ نے مبعوث کیا نبیوں کو بطور خوشخبری دینے والا اور پیش آگاہ کرنے والا‘‘
’’وَاَنْزَلَ مَعَھُمْ الْکِتٰبَ بِالْحَقِّ لِیْحَکَمَ بَیْنَ النَّاسِ مِمَّا اخْتَلَفُوْافِیْہِ‘‘
’’اور عطا کی ان کو ایک کتاب حق کے ساتھ تاکہ وہ فیصلہ کرے لوگوں کے درمیان ان معاملات میں جس میں وہ اختلاف کرتے ہیں۔‘‘

اس لیے تمام انسانیت ایک ہی تھی ایک ہی ہے اور ایک ہی رہے گی۔ یہ تو ہمارے آپس کے اختلافات ہیں جو ہم نے خود پیدا کئے ہیں اور جن کی وجہ سے ہم علیحدہ علیحدہ ہوگئے ہیں۔
ہر نبی نے انسانیت کو محبت پیار امن اور شانتی کا پیغام دیا ہے۔ کیونکہ ہم ایک مسلم گھرانے میں پیدا ہوگئے ہیں اور ہمارے ہاتھ میں قرآن ہے اس لیے ہم قرآن لے کر اٹھے ہیں۔ اور تمام انسانیت کو امن اور بھائی چارہ کی دعوت دیتے ہیں۔
قرآن کسی خاص فرقے مذہب یا طبقے کو مخاطب نہیں کرتا اور نہ ہی وہ کسی مسلمان کے مذہب کو تقویت دیتا ہے وہ تو پوری انسانیت کو مخاطب کرتا ہے اسی لئے سلسلہ دعوت قرآنی بھی کسی خاص فرقے یا طبقے یا مذہب کو مخاطب نہیں کر رہا۔ یہ سب سے پہلے خود اپنے گریبان مین جھانکنے کی دعوت دیتا ہے کہ دیکھئے قرآن آپ کو خود اپنی غلطیوں کا احساس دلانے کے لئے احکامات الٰہی کی طرف بلارہا ہے۔ اس لیے یہی ہماری دعوت ہے یعنی محبت، امن اور سلامتی کی دعوت اور یہی ہمارا مشن ہے۔ سورۃ البقرۃ کی آیت نمبر62 میں ارشاد باری تعالیٰ ہے۔۔۔

’’اِنَّ الَّذِیْنَ اٰمَنُواوَالَّذِیْنَ ھَادُوْا وَلنَّصٰرٰی وَالصَّابِءِیْنَ مَنَ اٰمَنْ بِاللّٰہِ وَالْیَوْمِ الْاٰخِرِ وَعَمِلَ صَالِحاً فَلَھُمْ اَجْرُھُمْ عِنْدَرَبِّھِمْ وَلَا خُوْفٌ عَلَیْھِمْ وَلَا ھُمْ یَحْزَنُوْنَ o‘‘
’’بلاشک وشبہ وہ لوگ جو اہل امن و ایمان ہیں اور وہ لوگ جو یہودی ہیں یا نصرانی یا کسی بھی مذہب کے ہیں جو بھی اللہ کے ساتھ اہل ایمان ہوا اور یوم الآخرۃ میں بھی اہل ایمان رہا اور جس نے اصلاحی عمل کئے انکے لئے ان کا اجر ان کے رب کے پاس محفوظ ہے اور ان کو نہ تو کوئی خوف ہے اور نہ ہی وہ ملال کرتے ہیں۔‘‘

یعنی قرآن کا یہ مسئلہ ہی نہیں ہے کہ کوئی یہودی کیوں ہے یا کوئی عیسائی کیوں ہے یا یہ کہ کوئی کس مذہب پر عمل پیرا ہے۔ قرآن تو ہر مذہب والے کو صرف ایک ہی نصیحت کر رہا ہے کہ اگر کوئی شخص خالق کے احکامات کے ساتھ اہل ایمان ہو یعنی امن قائم کرنے والا ہو اور معاشرہ میں اصلاحی عمل کرے تو ایسے شخص کا اجر اس کے رب کے پاس محفوظ ہے اور وہ کسی بھی کیے پر افسوس نہیں کرتا اور نہ ہی آئندہ کا خوف اسے تنگ کرتا ہے۔